هوامير البورصة السعودية

السلام عليكم ورحمة الله وبركاته

مساكم الله بالخير جميعاً
حيا الله كلن باسمه
اذكر واحد من الشيّاب يقول : ابن آدم في هالدنيا كأنه يركظ على جدار مايدري متى يطيح .. يقصد (الموت)
والموت لايفرق بين الكبير والصغير فمن حانت منيته وافاه الاجل

وبلح الهلالي يأتي متأخراً , وبقدومه تكون أكثر انواع التمر قد انتهت في نجد

( خراف الهلالي )

انا من شفت فذّات الهلالي
دريت ان النخل ودّع خرافه

وذكرني بعمري والليالي
وداعي الموت ينذر بنْصرافه

ابي الدنيا وهي بي ماتبالي
حسافه من تعنّيها حسافه

ونا ون مت مقبور (ن) لحالي
ولامال (ن) يعين وْلا ولافه

كفى يانفس من حب الكمالي
كفى من طوع قلبي ونجرافه

كفاني .. واستعدّي لرْتحالي
يعين الله على طول المسافه

ولكنّ الرجا في ذا الجلالي
لعبد(ن) مذنب(ن) قال اعترافه

شكى الحسرات ودموعه همالي
الى منّه طرى الحشر ومقافه

ألا ياالله يامحصي الرمالي
تبدّل شهوة القلب بعفافه

وتجْعل للعمر كسب ومعالي
وحسن خْتام في تالي مطافه

وسلامتكم

بــــقـــــلــــمـــــي

زكـــــــــــــي