هوامير البورصة السعودية - هنيكم ياللي (بالاقرع) تدوجون.......

المناسبه:
في احد ايام الربيع اتصل علي الاخ / سعود الكردي(ابويحيى) والاخ / غيث الغيث من منطقة (الاقرع) و(الحنظليه) بين عرعر والجوف وذكرا لي انهم الان يستمتعان بمناظر ورود الربيع بما في ذلك ورود الديدحان(شقائق النعمان) والتي اعشقها بجنون وتوجد هذه الورود في منطقة الحدود الشماليه وبلاد الشام.
وبعد المكالمه مباشره ولدت هذه القصيده التي آمل ان تنال استحسانكم:

هـنيكم ياللي (بالاقرع) تدوجـــون
بين الـزهـور اليـانـعـه والـنـديـــه

وانا ادوج بالخُبر تـقـل مـسجــون
ولا لي على ترك الخُبر مـقـدريــه

ياغيث قلبي في هوى البر مفـتون
وعيني تمنى شوفة (الحـنظـلـيـه)

ياغيث تـكـفى لابويحيى تـقـولون
خـويكـم ضاقـت عـليه الـفـضـيــه

خويكم في خـنجر الوقت مطعـون
وجـروح قـلـبـه يابويحيى خـفـيـه

قولوا حبيس الدار لازال مـغـبـون
من فـكـت الاطـنـاب ذيك الـعـشـيه

ويوم انكم للفرش ياسعود تطوون
والحزن ضافي تقل بشت اجوديـه

والله فلا انسى يـوم عـنا تـقـفـون
لحـظـة فــراقٍ بالـمآسي غــنـيــه

نفسي تمنى مجـلسٍ به تقهـوون
مع تمرة اهل الجـوف والشاذليـه

وسوالفٍ يطـرب لها كل محـزون
بالبر تـسـلى كـل نـفـسٍ شـقـيـــه

ياسعود ورد الديدحان لاتـوطــون
تراها عـندي يابويحيى حـظـيــــه

صبوا عليها الماء قبل لاتـعـــدون
خلوها تزهر بالـفـيـاض الـعــــذيه

وان كـنـتـم لذيك الليالي تـحـنــون
انا حـنـيـنـي تـقـل صـوت رعـديه

قولوا .. ولا للـرد منه تـحــــرون
إن رد .. رد بفعل .. ذيب السـريه

يالله يامنجي من الحوت ذي النون
يارب تـغـفر كـل ذنـب وخــطــيـــه

والخاتمه ياللي حضرتوا تـصلون
عـلى رسـول الله خــيـر الـبـريـــه

شعر/ احمد بن عبدالرحمن العريفي
(نديم المجره)

************

وبعد المكالمه ارسلت لهم الستة ابيات الاولى من القصيده.
فردوا الاخوان / سعود الكردي وغيث الغيث بهذه القصيده:

سـلام ياللي للـشـمـال يـتـمــنــــون
اهل الـقـلوب الـصـافـيات الـنـقـيـه

لو انهم كانوا على الشـط يمـشـون
لا شك رغبتهم هوى الـحـنـظـلـيـه

يبون عـقـب العـصر للجال يرقـون
وعـقـب المغـيـب الـدلة الـشاذلـيـه

يالـيـتـهـم ياغـيـث يـمـي يـمـدون
ولشوفهم ياغيث روحـي شـفـيــه

واسري بهم بالليل لارضٍ يحبون
يطرق بها الغـربي فـيـاضٍ عـذيه

القلب يطرب به ولو كان محـزون
واحلى ليالي العمر روحه وجـيــه

شعر /
سعود بن عبدالرحمن الكردي
و
غيث بن عبدالله الغيث