من الطرائف والحكم والأمثال !!!

المشاركة الأصلية كتبت بواسطة طيب الفاال

ايام الطفوله تقريباً عمري ( 12 ) سنه كنا نلعب عندالمسبح .. وفيه اثنين أولاد لابسين سروال سباحه واحد اسمه علي والثاني عبدالله جماعه .. وفيه ولد مصيبه وشجاع اسمه فيصل يجي عند خواله كل ليلة خميس وليلة جمعه . المهم حصلت مشكله بين فيصل الشجاع وبين علي وعبدالله .وهم طالعين من المسبح. قام فيصل وضرب فيهم ضرب ماهو طبيعي عطاهم ركب وجلدهم بعصا خيزرانه أنا اتفرج والوضع ما هو عاجبني لكن الولد مصيبة .. بعد هذه المعركة والضرب جاني (علي ) وقال وش رأيك قلت : لعن خييركم ودمركم .. المهم يا اخوان بعد اسبوع بالتمام يوم اربعاء جاء المصيبه فيصل كالعادة عند خواله وأنا العب كورة وفيه خطاء ( فاول ) طبعاً اشوت بالرجل اليسرى ..وشت الكورة بكل ما اوتيت من قوة وفي هذه اللحظه جاء ولد صغير يمشي بيقطع الملعب وجات الكورة في بطنه وانصرع... والأولاد يصيحون يا فيصل ( طبعاً فيصل جسمة مليان ومتعافي ولا يحب الكورة يلعب في جهة ثانيه ). صاحوا عليه الأولاد يا فيصل .. فلان ضرب أخوك بالكورة .. وهو يجي يركض مسرع مثل الثور الهائج .. يالها من لحظات حرجة .. إن شردت مصيبه وبتروح فيها سمعتي وبتفشل عند الأولاد .. وإن قعدت لهذا الثور المتعافي بيدمرني تدمير .. وأنا اعرف امكاناتي والله ما أقدر عليه مصيبة المصايب .. وهو يجي ويقول : ليش تضرب أخوي .. ليش تضرب اخوي .. قلت لحظه يا فيصل أنا بعلمك وش اللي صار .. وفي هذه اللحظه ( طلعت لي شاشة تلفزيون أشوف علي وعبدالله وهو يعطيهم ركب ويجلدهم بالخيزرانه ) قلت بس بيستلمني ركب وضرب .. قلت في نفسي ابتغفله وصكه بكف على كيف كيفك وبهرب للبيت طبعاً أنا أضرب باليد اليسرى وما هو متوقع هذا الشئ .. قلت يافيصل أنا جيت أبشوت الفاول ... وهو واقف بيسمع وش أقول .. وفجأة مادرى غير الكف بخده ( عهدي فيه يوم طير عيونه من كف الغفله ) وهربت مسرعاً للبيت اتحدى أي واحد يسبقني .. دخلت البيت وأخذ فيصل ومعه بعض الأولاد يرجمون الباب بالحجر طلع لهم الوالد الله يحفظه وطردهم .. ونجوت بفضل الله من هذه المصيبه .. وأصبحت كل يوم إربعاء وخميس خائف أترقب فيصل في أي لحظه يهجم علي .. وبعد ستة أشهر وفي غفلة من أمري ما دريت إلا فيصل ومعه خاله عبدالله.. بشحمه ولحمه واقف قدامي مثل الثور الهائج يقول ليش : تعطيني كف نسى ضربي لأخيه .. . يارب رحمتك وش ذا المصيبة اللي ما حسبت لها حساب .. وحطيت نفسي إني ما عرفه وقلت أنت مين ؟ ومتى عطيتك كف؟ وأنا التفت لعبدالله خاله .. ياعبدالله متى عطيته كف ..وأنا اتغفله في لحظة ومادرى إلا الكف الثاني بخده وأنا اهرب مسرعاً وروح للبيت ... وبعد فترة من الزمن .. طبعاً قالوها الرياجيل ( الثالثة ثابته ) وهو يمسكني على غفلة وأنا جالس على الرصيف .. ولا كلام ولاشئ حط يده في حلقي وخنقني ..
فكان ما كان مما لست أذكره
فظن شراً ولا تسأل عن الخبر
..خنقني حتى طلعت عيوني .. والحمد لله رحمني الله بشباب كبار تدخلوا وطلعوا يده من حلقي وفرقوا بيننا .. قال : خلاص ما عاد تعودها قلت : خلاص ما عاد اعودها... اعتقد كفين مقابل خنقه مقبوله ... وسلامتكم ..