لتبليغ الإدارة عن موضوع أو رد مخالف يرجى الضغط على هذه الأيقونة الموجودة على يمين المشاركة لتطبيق قوانين المنتدى

العودة   هوامير البورصة السعودية > >


إضافة رد
 
أدوات الموضوع انواع عرض الموضوع
<
قديم 28-10-2012, 05:39 PM  
#1
!سعود!
كاتب مميز
 
تاريخ التسجيل: Oct 2006
العمر: 7
المشاركات: 5,939

Icon5 عندك بطاقة ائتمانية او ناوي تطلع بطاقة ائتمانية .. مهم جدآ تقرأ هالموضوع ..!!

اولآ اتمنى من ادارة المنتدى تثبيت الموضوع
نظرآ لاهميتة
ثانيآ اتمنى من جميع المهتمين بالبطائق الائتمانية
المشاركة الهادفة في الموضوع




بسم الله الرحمن الرحيم .

هذا الموضوع : هدية العيد ,,, أتمنى تعجبكم وإنكم تقبلونها .

شفت كثير من الشباب هنا يتكلم عن الفيزا وشاركت بمواضيع كثيرة عن الفيزا فحبيت اسوي ملخص يتضمن بعض خبرتي بالتعامل مع الفيزا مع معلومات اخذتها من الشباب و خليت الشرح مبسط خصوصا في بداية الموضوع .(يمكن البعض يتضايق من الأسلوب لأنه فاهم الموضوع , لكن صدقوني الأسألة الي وصلتني من بعض المشاركات خلتني اعرف ان في كثير ما يدرون وش الطبخة مطلع فيزا عشان يشتري وما يدري وش بعد كذا).
وبسميها هنا (كردت) او البطاقة , عشان ما اكون اتكلم عن نوع معين فيزا او ماستر او امريكان اكسبريس, وفي النهاية كلهم نفس المفهوم.

بعض الأمور الي بتكلم فيها :
- نبذة بسيطة .
- طريقة حساب العمولة في البنك وطرق السداد .
- كيف تستفيد من البطاقة الإستفادة المثلى.
- بعض الامور الي مايعرفونها مستخدمي البطاقات .
- العروض الدائمة للبطاقات .
- العروض المؤقته للبطاقات .
- التصرف عندما تشتري بالبطاقة من تاجر نصاب.
- سجلك الإئتماني.
- كيف تختار الفيزا تبعك والبنك.
- عليك مديونية في سمة .
- غير موظف ؟
- بطاقات الصراف .

شركة الفيزا وشركة ماستركارد وأمريكان اكسبريس وغيرهم , هم شركات بنكية (مالية) مابينها فرق اذا عندك فيزا او ماستركارد كلها واحد يمكن في اوروبا يستخدمون الماستر اكثر من الفيزا واغلب الأماكن 99% تقبل البطاقتين, البطاقة تقوم فكرتها على ان اذا استعملت البطاقة تخصم من رصيدك الوهمي (هذا الرصيد يحدده راتبك وسجلك الإئتماني ويزيد كل فترة إذا تستخدم البطاقة بكثرة) الموجود لديهم ثم اخر الشهر يصدرون لك كشف ويخيرونك كيف تسدد بالطريقة الي تريحك .

بشرح الموضوع أكثر , مثلاً انت طلعت بطاقة ماستركارد من اي بنك , البنك يعطيك سقف ائتماني يسمونه بالإنجليزي (ليمت) مثلاً 10.000 ريال , تقدر تشتري من هذي البطاقة بالكثير بهذا المبلغ . سواءً اشتريت من المحلات التجارية او مواقع الإنترنت وغيرها .

اخر الشهر (لكل بنك يوم معين يصدر لك فيه كشف الحساب) بنك ساب مثلاً يصدر لك الكشف يوم 15 الشهر . والجزيرة يوم 10 وامريكان اكسبريس يوم 25 .
بداية الشراء بالبطاقة تكون ثاني يوم للكشف مثلا لو الكشف يوم 1 الشهر بداية الشهر تكون يوم 2 ويحسبون لك شهر لين يوم 1 الشهر الجديد.
جاك الكشف مثلاً يقول تراك اشتريت ب6000 ريال .

انت الحين مخير بين 3 مواضيع ,,
الأول: انك تسدد كامل المبلغ والبنك يعطيك فرصة عادتاً من 15 - 20 يوم بعد صدور الكشف . اذا سددت المبلغ كامل البنك مو مستفيد منك ولا ريال , ما بيطلع له منك عمولة أو اي شي ثاني.
وهذي الطريقة الي انا أفضلها وأستعملها دايم , سدد سدد سدد .

للمعلومية الكشف يصدر بالنت ادخل على موقع البنك وشوفه لا تنتظر بالبريد كثير من الاحيان البريد يجي متأخر.

الثاني: تسدد جزء من المبلغ على الأقل 5% يعني 50 ريال من كل الف ريال . وبكذا البنك ما يأخذ عمولة على الي سددته لكن يأخذ عن الباقي . يعني لو سددت 1000 ريال وبقى عليك 5000 ريال يأخذ على ال5000 ريال اغلب البنك تأخذ بين 2 إلى 2.5% يعني 25 ريال على كل ألف متبقية . لكن للمعلومية العمولة الي اخذوها تضاف لحسابك والشهر الجاي تحصل حسابك دخلت فيه العمولات كأنك شاري من محل بهذا المبلغ يعني لو أخذو عمولة 2.5% على ال5000 , يصير حسابك عليه 5125 ريال وبكذا البنك يستفيد اذا ما دفعت الشهر الي بعده ان المبلغ زاد عليك (يسمونها تراكمية).

الثالث: إنك تسحب عليهم وبكذا تتورط يأخذون عليك غرامات تأخير حسب البنك والبطاقة عادتاً 150 ريال, بعض البنوك ما تأخذ غرامة تأخر . وبعد كم شهر تحصل اسمك صار في مديونيات سمة . وانت صرت بلاك لست في البنك .
عادتاً البنك يتصل عليك ويغثك ويجيب لك المرض يعني لاتخاف ما بتنسى التسديد :new3:

موضوع سحب الكاش:

البطاقة تعطيك صلاحية تسحب 50% من رصيدك بشكل كاش يعني لو الليمت عندك 10.000 ممكن تسحب 5000 ريال كاش من نفس صراف البنك الي اصدر لك البطاقة .
لكن للمعلومية يوجد عمولة على سحب الكاش مبلغ 75 او 100 ريال (حسب البنك) لكل عملية سحب تقوم بها .
أنا افضل اني ما اسحب كاش ابد . لكن لو تشوف انك مضطر اسحب مبلغ كبير لأن كذا انت دافع دافع , عشان ما تحتاج تسحب مرة ثانية وتدفع مرة ثانية رسوم .

لكن بعض البنوك تأخذ عمولة عالية على الكاش مثلاً 3.5% على المبلغ كامل وما تأخذ مبلغ مقطوع يعني لاتسوي شاطر وتسحب مبلغ كبير :new3:

عمولة استخدام البطاقة في المحلات التجارية والمواقع :

البنوك تجبر المحلات إنها تستخدم نظام الفيزا والماستر عند طلبهم مكاين الشراء ويوقعون معهم اتفاقيات انهم يقدمون خدمة للعملاء وبدون رسوم , طبعاً البنك يأخذ رسوم من المحل سمعت انها 1.5% - 2.5% وللأمريكان اكسبريس 3.5% , لكن ترى اذا صارت كمية الشراء في المحل مرتفعة البنك ما يأخذ عليه عمولة .

بعض المحلات يمنعك انك تشتري بالبطاقة لأسباب ثلاثة :

الأول:
الفيزا تأخذ عليه عمولة مقابل انه استفاد من عملائها .

بختصار المحل الشاطر يخلي عملاه يستخدمون البطاقات وبكذا يطلع من الموضوع لكن البائع الغبي يلف ويدور يقولك الشبكة عطلانه أو في مشكلة في الشبكة و يخليك تروح للصراف بكذا يكون ضايقك وما استفاد شي , أو يطلب منك العمولة الي البنك يأخذها منه وعادتاً يزيد عشان يستفيد :new10: .
ممنوع تعطيه عمولة , لكن اذا كنت مضظر تشتري وماعندك غير الفيزا ممكن تشتري منها (مثل ما نقول محدود عليه) ادفع وخذ ايصال الشراء والفاتورة , واعمل مطالبة للبنك وبتكلم عنها بعدين :7: .

انا صارت لي في مستشفى معروف دفعت 5000 ريال تأمين وبعد اسبوع رجعها لي 4830 لاني حاسبت بالأمريكان اكسبريس أخذ 170 ريال يقول عمولة 3.5% , ما تكلمت معهم نهائياً اخذت الفواتير ومشيت وانا راجع البيت اتصلت على خدمة العملاء وبعد شهر رجع لي المبلغ .

السبب الثاني:
ان الشراء بالكردت ما يوصل لبعض البائعين المبلغ بسرعة ,ينزلونه بحسابه (المبلغ ينزل بالحساب - عشان مايقول لي احد حرام البيع الآجل في بعض السلع والدليل انه ينزل بحسابه ان الكاشير اخر اليوم يطبع برنت من المكينه فيه ملخص جميع العمليات ويسمون هذا الملخص موازنة) لكن المبلغ يكون معلق يعني ما يقدر يستفيد منه . يأخذ شهر أو شهرين ثم يفك التعليق عشان لو صارت شكوى من المشتري عليه يتم التصرف معه (بتكلم عن النقطة هذي بعدين) .

السبب الثالث:
ان بعض المحلات (الأغلبية) بسم شخص والحل يديره شخص آخر , مثلاً بالسعودية عندنا يكون المحل للعمالة لكن بإسم الكفيل , واذا نزل المبلغ بحساب الكفيل ممكن يسحب عليهم او يعرف ان المحل ايراده مرتفع فيزيد عليهم المبلغ الي متفقين عليه مقابل التستر عليهم :new10:.

بالنسبة لي اذا شريت من محل أصر على الشراء بالبطاقة وأرفض اني أروح للصراف إلا بعد ما يحاول يسحب من البطاقة 3 مرات لين يزهق مع التأكد ان خط التلفون موصول بالجهاز مو يكون فاصله عشان يقولك متعطله .

من يومين في مطعم كبير بالرياض جيت احاسب 290 ريال قالي روح الصراف , قلت له اختار اما بطاقة او بجيك يوم ثاني احاسب خصوصاَ انك ماقلت لي ان البطاقة عطلانه قبل اطلب الاكل . وفعلاً قالي تعال نجرب وعلى طول انسحب المبلغ :68: بعد شوي سمعته يقول لواحد حسابه 400 وشوي ان المكينة عطلانه وخلاه يروح الصراف :21:

المشكلة بعض اصحاب المحلات يفهمون العامل ان البطاقات تأخذ عليهم رسوم عالية وامور كذب لانه اما ما يبي المبلغ يدخل في حسابه او مو فاهم وهذا الاكثر , ما عندهم ثقافة استخدام البطاقات , وللأسف مطاعم الوجبات السريعة المعروفة ماعندها مكاين !!

نقطة مهمة :::: اذا صارت العملية مرفوضة إحتفظ بالإيصال لين يجيك كشف الحساب اذا حصلت العملية موجودة بكشف الحساب اعمل اعتراض للبنك .وعادتاً ما تصير هذي العملية , لكن الإحتياط واجب.


الشراء من الإنترنت

كلكم يعرف ان صرف الدولار بالنسبة للريال 3.75 , لكن البطاقات تأخذ عمولة تحويل تتراوح بين 0 - 1.5 - 2.5% وبالكثير3% .

الراجحي مثلاَ 1.5% عشان كذا يطلع الصرف 3.79 , ساب وسامبا 3.83 أمريكان اكسبريس 3.84 وبعض البنوك 3.86 .

وهذا الموضوع للي يشتري من الانترنت اقل من 5000 ريال بالسنة ما يهمه لان الفرق يكون 10 - 16 ريال في الألف ريال , واعتقد الي بيشتري ب1000 ريال يكون دفع قيمة السلعة والشحن والتأمين ما تفرق معه 13 ريال .

بعض البطاقات ما تاخذ فرق تحويل مثل أمريكان اكسبريس الإتحاد بالدولار (مو الزرقاء ولا الذهبية) لكن رسومها عالية 150 دولار سنوياً .
وسمعت ان بطاقات بنك البلاد و الاهلي قطاف (مو المسبقة الدفع) ما تأخذ بس مو متأكد .

شروط استخراج البطاقة

عادتاً تشترط البنوك انك تكون موظف يطلبون تعريف راتب وكشف من البنك الي تحط فيه فلوسك اخر 3 شهور .
مو شرط يكون راتبك يتحول للبنك بس يكفي انك تستلمه وتروح تودعه كل شهر .
أو تجيب شي يسمونه مسير الراواتب .

بعض البنوك لو تودع 70 - 100 ألف يعطونك اياها.

اسلامية او ربوية ؟؟؟!!!

بعض الناس يتخوف من البطاقة ويقول انها ربوية . اغلب البنوك اذا كانت كلها لديها بطاقات اسلامية , وأنت تقدر تسأل عنها قبل تطلعها , حتى البنوك الأجنبية فيها صناديق اسلامية وبطاقات اسلامية , عموماً لو متخوف منها ممكن تستخدمها بالطريقة الأولى انك تسدد كل شهر كل الي عليك وبكذا ما بيحصلو منك عمولة .

كيف أختار البنك؟

البنوك حالياً شبه متساوية بالمميزات , اختر بنك ينزل عليه راتبك او تستعمله بكثرة , واقرى الموضوعات الموجودة في المنتدى , الأغلبية تنصح بالبنوك الي فيها اسم اجنبي :new3: مثل ساب , سامبا وغيرها .

انت لو تقدر تطلع من اكثر من بنك اتصل عليهم وشوف خدماتهم او ادخل موقعهم في النت .

انا ما راح انحاز لأحد في الموضوع لكن ابعد عن هذي البنكين ,, الر***** والر****** . :68:

والي عنده بطاقات كثيرة ما تضره خصوصاً اذا استخدامه قليل او يستخدم ويسدد , لأن احيان تنزل عليها عروض وتستفيد منها وبتكلم عنها بعد شوي.

أغلب البطاقات السنة الأولى مجانية والسنة الثانية من 150 ريال وفوق حسب البنك ونوع البطاقة .
بعض البطاقات مجانية طول العمر مثل بطاقة قطاف من البنك الاهلي .

وبعضها أحلم بالمجاني :67: الأمريكان اكسبريس من اول كشف يجيك رسوم السنة :new14: . 200 ريال للزرقاء و400 الذهبية .

وش اسوي لو انا مو موظف او اسمك في سمة وما تقدر تطلع كردت كارد؟

اذا كنت من الي عليك مديونية في سمة ,
اذا كان عليك دين نصيحتي لك حاول تحل المشكلة انك تسدد الي عليك او تتفاهم مع الجهة الي عليك مديونية لها مثلاً شركة الاتصالات تعطيك امكانية خصم من المديونية وامكانية الدفع اقساط .
لأن سمة كل يوم تكبر وتزيد شروطها بيجي يوم تمنع من السفر وتمنع من تجديد اوراقك في الاحوال وغيرها . لا تستهين بالموضوع .
حتى ايجارات البيت الحين في نظام يشتغلون عليه يتم الربط بينك وبين سمة .

اذا كنت مسدد لكن اسمك لايزال معلق خذ مخالصة من الجهة الي تطلبك , وروح لسمة وحاول تسوي شي , على الاقل يشيلون اسمك من السنة الثانية .

,,,,,,
اذا كنت مو موظف تقدر تدبر نفسك اودع مبلغ متساوي 3 شهور وجيب تعريف من اي مكان مصدق من الغرفة التجارية , خصوصا ان التعريف يكتبون فيه دون ادنى مسؤولة على الشركة , يعني الي يعطيك التعريف ما له دخل فيك :new14: بس مجرد اثبات انك تعمل .
....
الحل الأخير:
بعض البنوك عندها بطاقات مسبقة الدفع وبعضهم يسميها بطاقة إنترنت مثل الراجحي , الأهلي , الرياض , البلاد , حاول تأخذ منهم وتقدر تستعملها كانها بطاقة عادية بس الفرق ان البطاقة العادية هم يعطونك رصيد والبطاقة هذي انت الي تشحنها .

----------------------------------------------------
يمكن هذا الكلام اغلبكم يعرفه لكن بتكلم عن موضوع الإستفادة من البطاقات :

كثير من البطاقات فيها امكانيات إستفادة بتكلم عنها .

- الكاش باك : يعني كل 100 ريال تشتري فيها يرجع لك منها ريال او ريالين أغلب البنوك ريال يعني 1% , الاهلي تيسير 2% , وسمعت ان الهولندي 2% .

- النقاط : نفس الفكرة بس بدل ما يجيك فلوس يجيك نقاط او أميال سفريات تنحط في حسابك لين تتجمع وتقدر تصرفها .

وفكرة الكاش باك والنقاط اسلامية ما بشرحها لكن بقولكم مثال : الكل يقول ان الراجحي اسلامي , بطاقات الراجحي تعطيك نقاط عن كل عملية شراء وكل ما تجمع 250 نقطة يعطونك 100 ريال , والجزيرة نفس الشي اسلامي ويعطيك كاش باك 1% .

- كثير من المحلات التجارية تتعاقد مع البنوك , مثلاً تشوفون من كم شهر في بنده وهايبر بنده ومكتبة جرير وكارفور واللولو هايبر ماركت دعايات لبعض البنوك , ومسوين عرض مخصص للي عنده هالبطاقة نقاط اكثر او خصم .

- بعض المحلات تتفق مع احد البنوك ان الي يشتري بستخدام الفيزا تبعه يقسطون له السلعة سنة بسعر الكاش , او يحطون عرض خصم مدة معينة لحاملي البطاقة .

تأمين السفر:

اغلب بطاقات الفيزا تعطيك تامين في حال انك اشتريت تذاكر وصار لك شي , بعض الناس يقول وش بستفيد وانا اكون ميت :new14: فكر باهلك :new8: .

تأمين متاعب السفر + العفش

بعض البطاقات تعطيك تأمين مبلغ معين على العفش لو ضاع منك أو صار له تلف .
وتامين على متاعب السفر بعوضونك لو تأخرت عليك الطيارة او نزلوك اجباري في مطار اخر يصلحون صيانة او يبدلون الطيارة .

تأمين على مشتريات الإنترنت

بعض البطاقات تعطيك تامين لو صار شي لأغراضك .

خدمات أخرى ,, دخول صالات VIP في المطارات .

بعض البطاقات تعطيك ميزة انك تدخل صالات الإنتظار في المطارات .
مثل الأمريكان اكسبريس الذهبية والإتحاد . والبطاقات التاتينبوم وغيرها لبقية البنوك .
لكن تأكد من بعض الأمور قبل :
بعض البطاقات الدخول مجاني وبعضها في رسوم مثلاً 120 للشخص.
بعض البطاقات تشمل الأكل والشرب والكوفي داخل الصالة .
بعض البطاقات تشمل زوجة وبعضها لا بس طفلين .
وعشان تتغلب على هالمشكلة طلع بطاقة مرافق للزوجة او الأم حسب الشخص الي دايم يسافر معك اغلب البنوك البطاقة الإضافية مجانية , واذا خايف يشترون فيها اترك البطاقة معك وخذها في السفر فقط .


............................ ***** وال****** ............................

سواء في المحلات او الإنترنت لو تعرضت لموضوع *** مثلاً شريت غرض من النت وجاك شي ثاني او جودة سيئة اعمل مطالبة لا تتردد وبترجع لك فلوسك , نفس الشي في المحلات التجارية أو في المشتريات الأخرى .
بطاقات الكردت عليها تأمين ما راح يخسرون شي .

بعطيكم مواقف صارت لي , مرة شريت برنامج من بلاك بيري ب7.99 دولار يعني حوالي 30 ريال , ما اشتغل راسلت صاحب البرنامج قالي 24 ساعة برسل لك الكود, اول ما كملت 24 ساعة كتبت خطاب للبنك بعد يومين كلمني البنك قالي خلال 50 يوم ترجع لك فلوسك .

مرة موقع تعليم لغة إنجليزية كان مسوي عرض شهر ب1دولار , الشهر الثاني خصم 69 دولار ., اتصلت للبنك طلبت بطاقة بديلة لان هذا كل شهر بيجلس يسحب , وعملت اعتراض ورجعت لي 260 الي سرقوها .
بس دفعت 50 ريال قيمة البطاقة البديلة .

لاتتردد ولا تقول المبلغ بسيط , انت ممكن تدفع اي مبلغ برضاك لكن ما تحب أحد يستغفلك ويقولون شغب مغفل .


السجل الإئتماني

بعض الناس يقول انا عندي بطاقة بس ما استخدمها نهائياً أو استخدمها وقت الضرورة فقط !!

كل ما اشتريت من البطاقة وسددت يصير لك سجل إئتماني ممتاز , كل البنوك تقدر تشوف سجلك في الفيزا عن طريق سمة, وهذا الشي يفيدك لو جيت تأخذ قرض مستقبلاً او قرض عقاري تشتري بيت .
تكون عميل نسبة الأمان في التعامل معه عالية .
تزيد المبلغ الي ممكن يعطيك البنك وممكن مستقبلاً تقل الفائدة الي البنك يأخذها عليك بعتبار البنك دائماً ينظر لموضوع المخاطرة , يعني تكون أقل مخاطرة بالنسبة للبنك .

بطاقة الصراف اقدر اشتري فيها بالنت؟

ممكن تستعمل بعض أنواع بطاقة الصراف ويسمونها الديبت كارد - فيزا الكترون - الشبكة . انك تشتري في الإنترنت مثل بطاقة بنك الانماء وقديما البنك العربي . لكن ما تكلمت عنها بعتبارها ليست بطاقة فيزا وفي موضوع في المنتدى يتكلم عنها .

أتمنى أكون تكلمت عن أغلب النقاط الي تخص بطاقات الفيزا , ولو نسيت شي ذكروني , واي استفسار حاضرين :69:


** للمعلومية انا مو موظف بنك ** لكني دارس شوي مالية :45: واستخدم البطاقات من فترة طويلة وتعلمت من الي يستعملونها ومن المنتدى بعض الأمور وحبيت انقل معلوماتي وخبراتي لكم ** إذا كان في أخطاء نبهوني عليها وإذا نقص علموني ** واعتذر لو أخطيت في حق أحد أو نقلت معلومة غلط **

((منقول))

!سعود! غير متواجد حالياً   رد مع اقتباس
 
 

قديم 28-10-2012, 06:09 PM   #2
هامورالبحر
عضو هوامير المميز
 
تاريخ التسجيل: Jan 2011
المشاركات: 1,649

رد: عندك بطاقة ائتمانية او ناوي تطلع بطاقة ائتمانية .. مهم جدآ تقرأ هالموضوع ..!!

جزاك الله الف خير
ماقصرت اخوي

هامورالبحر غير متواجد حالياً   رد مع اقتباس
قديم 28-10-2012, 06:47 PM   #3
ابوريان1420
عضو هوامير المميز
 
تاريخ التسجيل: May 2005
المشاركات: 877

رد: عندك بطاقة ائتمانية او ناوي تطلع بطاقة ائتمانية .. مهم جدآ تقرأ هالموضوع ..!!

جزاك الله خير بس لي راااي خاااص وربي مهما كنت شاطر فالبنك اشطر نوهقنا ببطاقه الخير لسامبا والله اني كنت اسدد لهم مبلغ 2500 ريال في فتره من الفترات الحد الائتماني 42000وربي سته اشهر اسدد 2500 لما رحت قلت كم المتبقي قال 39 الف كنت بجن كيف قال 39 قلت دافع 15000 ولا سحبت قال هذا الحاصل دبرت سلفه وسددتها مباشره وربي ارتحت الحمد لله واتصلو يقولو مبرووك رفعنا لك الحد الى 62 قلت الله يكفينا شركم
ابوريان1420 غير متواجد حالياً   رد مع اقتباس
قديم 28-10-2012, 07:07 PM   #4
م ح م د
كاتب قدير
 
تاريخ التسجيل: May 2005
المشاركات: 11,522

رد: عندك بطاقة ائتمانية او ناوي تطلع بطاقة ائتمانية .. مهم جدآ تقرأ هالموضوع ..!!

بارك الله فيك
 
التوقيع - م ح م د

.

اللهم اغفر لي ولوالديّ وارحمهما ، واجمعنا بهما في الفردوس الأعلى .

.

م ح م د غير متواجد حالياً   رد مع اقتباس
قديم 28-10-2012, 07:21 PM   #5
بندر987
عضو هوامير المميز
 
تاريخ التسجيل: May 2007
المشاركات: 9,907

رد: عندك بطاقة ائتمانية او ناوي تطلع بطاقة ائتمانية .. مهم جدآ تقرأ هالموضوع ..!!



انا من سنين اخذت بطاقة ولم استعملها وكانت ذهبية

طالما لديك القدرة المالية افضل الابتعاد عن اي بطائق

ائتمانية ... وايضا لدي استفسار هل هي شرعية 100%

اما لا ؟

بندر987 غير متواجد حالياً   رد مع اقتباس
قديم 28-10-2012, 07:27 PM   #6
hisham1
كاتب قدير
 
تاريخ التسجيل: Dec 2010
العمر: 57
المشاركات: 9,125

رد: عندك بطاقة ائتمانية او ناوي تطلع بطاقة ائتمانية .. مهم جدآ تقرأ هالموضوع ..!!

السلام عليكم و بارك الله فيك اخي سعود
hisham1 متواجد حالياً   رد مع اقتباس
قديم 28-10-2012, 07:27 PM   #7
كوثر
عضو هوامير المميز
 
تاريخ التسجيل: Sep 2006
المشاركات: 4,530

رد: عندك بطاقة ائتمانية او ناوي تطلع بطاقة ائتمانية .. مهم جدآ تقرأ هالموضوع ..!!

طيب بطاقة الراجحي يتم استقطاع المبلغ

مع الراتب

كوثر غير متواجد حالياً   رد مع اقتباس
قديم 28-10-2012, 07:30 PM   #8
spook1
عضو هوامير المميز
 
تاريخ التسجيل: Dec 2011
المشاركات: 4,134

رد: عندك بطاقة ائتمانية او ناوي تطلع بطاقة ائتمانية .. مهم جدآ تقرأ هالموضوع ..!!

بارك الله فيك
spook1 غير متواجد حالياً   رد مع اقتباس
قديم 28-10-2012, 07:33 PM   #9
المختصر
المشرف العام
مالك ومؤسس شبكة هوامير البورصة السعودية
 
تاريخ التسجيل: Jan 2005
المشاركات: 25,296

رد: عندك بطاقة ائتمانية او ناوي تطلع بطاقة ائتمانية .. مهم جدآ تقرأ هالموضوع ..!!

موضوع يستحق
 
التوقيع - المختصر

المختصر غير متواجد حالياً   رد مع اقتباس
قديم 28-10-2012, 07:47 PM   #10
عقــاب بن صــقر
عضو موقوف
 
تاريخ التسجيل: Mar 2012
المشاركات: 25,128

رد: عندك بطاقة ائتمانية او ناوي تطلع بطاقة ائتمانية .. مهم جدآ تقرأ هالموضوع ..!!

اقتباس:
المشاركة الأصلية كتبت بواسطة المختصر مشاهدة المشاركة
موضوع يستحق
ابو سلطان الله يرضى عليك لاتنسى الموضوع اللي كلمتك عنه

عقــاب بن صــقر غير متواجد حالياً   رد مع اقتباس
قديم 28-10-2012, 07:54 PM   #11
ابووعبدالرحمن
عضو هوامير المميز
 
تاريخ التسجيل: Mar 2010
المشاركات: 1,450

رد: عندك بطاقة ائتمانية او ناوي تطلع بطاقة ائتمانية .. مهم جدآ تقرأ هالموضوع ..!!

بالنسبة للبطاقة مسبقة الدفع (يعني حقت الشحن) هل تعمل في الدول الاروبيه وامريكا أو فقط حدها دول مجلس التعاون الخليجي والدول العربية آمل ان الجواب يكون أكيد

ابووعبدالرحمن غير متواجد حالياً   رد مع اقتباس
قديم 28-10-2012, 08:06 PM   #12
ابومشعل111
عضو هوامير المميز
 
تاريخ التسجيل: Aug 2009
المشاركات: 364

رد: عندك بطاقة ائتمانية او ناوي تطلع بطاقة ائتمانية .. مهم جدآ تقرأ هالموضوع ..!!

ساب او الاهلي فقط
ابومشعل111 غير متواجد حالياً   رد مع اقتباس
إضافة رد






مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] معطلة
كود HTML معطلة

الانتقال السريع




11:53 PM


الاعلان بمنتدى هوامير البورصة
تشغيل وتطوير افاق الإقتصاد
Powered by vBulletin® Version 3.8.7
Copyright ©2000 - 2017, vBulletin Solutions, Inc.
جميع المواضيع و الردود المطروحة لا تعبر عن رأي المنتدى بل تعبر عن رأي كاتبها وقرار البيع والشراء مسؤليتك وحدك

بناء على نظام السوق المالية بالمرسوم الملكي م/30 وتاريخ 2/6/1424هـ ولوائحه التنفيذية الصادرة من مجلس هيئة السوق المالية: تعلن الهيئة للعموم بانه لا يجوز جمع الاموال بهدف استثمارها في اي من اعمال الاوراق المالية بما في ذلك ادارة محافظ الاستثمار او الترويج لاوراق مالية كالاسهم او الاستتشارات المالية او اصدار التوصيات المتعلقة بسوق المال أو بالاوراق المالية إلا بعد الحصول على ترخيص من هيئة السوق المالية.