راكب اللي كن زولـه خيمـة مبنيـة
=طرف روض تلاعب نسمته وزهوره
جيب لكسز كل حاجاته مثـل ماهيـة
=لا اطاراتـه ولا بطنـه ولا ديكـورة
مانصاه السمكري يفحص على بوديـه
=ولابعد طل الميكانيكي على ماطـورة
لاوقف كلـن يقـول اواه ليتـه ليـه
=ولامشى كن العرب من مشيته مقهورة
هيبته هيبة ملك يصهل على كرسيـه
=وكل هيبه تقدر الا هيبة اخو نـورة
لانتحى خشمه عصر مع طلعة القديـة
=ملتون في طارته غمر طوال شبورة
علمو ساهر يكـب اللوحـة الرقميـة
=زين كانه لاكدش جنبه لقط له صورة
المكيـم يلمـح اصطباتـه الخلفـيـه
=والمهدي لو يطالـع مايوكـد نـورة
مستعد للطريـق ومنتـون لـه نيـه
=مانبا نبحث خفاه ولانمـس شعـورة
لين ياصل بيت راع العملـة الدوليـة
=شاعر في عصرنا الحالي يعد اسطورة
ذاك ابو سلمان راع الكلمـة المعنيـة
=الفطيـن يجيـب الـدرة المغمـورة
والحكيم اللـي يحكـر الدلـة البريـة
=لين يجذبنا بهـار الدلـة المنحـورة
كل ماقمنـا نطالعهـا يقـول شويـه
=وان زعلنا قال دعها فانها مامـورة
واثـق مايعتـرف بالغلطـة العفويـة
=ماهر مايعترف بالكلمـة المجبـورة
عايش فـي غابـة طرافهـا محميـة
=نبتها ينعش عبيرة وارضها ممطورة
يفتل عضودة على عـد تمـاح دليـه
=ماتحرى شربه الكاسة من الماصورة
من هنا نخلف مسار الرحلـة الجويـة
=ونبرم الفكر الغشيم ونخرجه عن طورة
يامحمـد لاتقـول السالفـة عـاديـه
=حتى لو كل يقيمها حسـب منظـورة
لاتخليهـا كذيـا وانـت نـارك حيـة
=سل سيف المعرفة للعالم المكبـورة
عالم ماتعـرف الا العطلـة النصفيـة
=ثورة ولاباحت العطلة تبيح الثـورة
والديار الهـا رسـوم وكلنـا طرقيـة
=والنهاية يومنا اللي ماتطير طيـورة
ذا كلامي وانت تملك مطلـق الحريـة
=لو بلشنا فالزمان اللي فتح حنجـورة
احد شعـرة يعـم الكـورة الارضيـة
=واحدن شعرة يشابة موية النافـورة
رد الوالد اطال الله عمرة
راكب اللـي كنهـا الشيهانـة البريـــة
=تاخذ اوصاف مـن الشيهانـة المعـورة
موهوهـا بالطبيعـة للظـروف السـيـة
=ماتطير الا ليـا جـت حالـة مخطـورة
صمموها فـي امريكـا الدولـة الحربيـة
=وارسلوها للطلب في لازمـي مسخـورة
والمطار السهلة اللي عن حضـن شرقيـة
=في ضواح الوادي اللي عطفته محظـورة
سهلـة ربـي بسطهـا كنهـا الزولـيـة
=والحصى فيها سوات السبحة المنثـورة
النـزول صعيـب لكـن صلهـا جبريـة
=ما اقتبس من شور غيرة يقتبس من شورة
كبتنـن مايلتبـس غـتـرة ولا طاقـيـة
=فوق راسة خـوذة بزرارهـا مـزرورة
جيت لا الطيـار واقـف قلـت يالله حيـه
=قال تبقـى ياسفيـر الديـرة المعمـورة
قلـت قلـط للعشـاء عزيمـة فـوريـة
=قال انا رجال عجـل وخلهـا مقصـورة
ثـم سلمتـه خطـاب ظرفـتـه ايـديـه
=واستدارت واددعاء بالدعـوة الماثـورة
لقلعـت تهتـز منهـا البنيـة التحتـيـة
=والبلاد اللي مجاورهـا تهـز قصـورة
ما انقطع صالي لهبها الا ورى الحوميـة
=ماكذب من قال مال الجو غيـر صقـورة
عن مطـار العاصمـة ماغيـر الوجهيـة
=في شمالي الرياض اللي كبيـر سـورة
مـن نـزل فمدرجاتـه يرتهـب فضويـه
=كنها نيرة مصـاف النفـط فـي تنـورة
ناصي اللي من وصل له حاجته مقضيـة
=والخطاب اليا قراء فحـواه زاد سـروره
شاعر يعرف وش اللي له من اللـي ليـه
=رايته بيضاء على راس العلم منشـورة
له مـع اهـل المعرفـة مكانـة علويـة
=كل مايذكر له المرجان غـاص بحـورة
ريشـة الابـداع ترسـم لوحـة فنـيـة
=والغشيم يخطـط الجـدارن بالطبشـورة
رد ابو سلطان له فـي هاجسـي هميـه
=ياهل الصرف الثمين جهودكم مشكـورة
القصيدة شغلي الشاغـل ماهـي منسيـة
=القريحـة حاضـرة واقلامهـا ماسـورة
من هناء شمس الضحى تقصر طويل الفية
=والجمل تصغي رقبته حنـوة الباكـورة
لابغاء المرعى عن المرعى حزمت اللحيه
=اطرقة بالخيزرانـة ليـن ينسـع زورة
وان شهرت السيف جاله كل يوم ضحيـة
=واطلق ا لجمال حبل جمالـة المقطـورة
مير ابونـا ادم ماوكلنـي علـى الذريـة
=كل جسم له لبـاس وحالتـه مستـورة
والبشر في حـب بنـت العامـري مبيلـة
=شف سراهم يامحمـد واقـف طابـورة
ماعليـه اللـي يجيـد الـوزن والقافيـة
=لاطمر فوق المنصة صفقـوا جمهـورة
جايـب فـي جعبتـه بطاطـس مقلـيـة
=دافـع عنهـا زميلـة قيمـة الفاتـورة
لانتهـا قالـوا هـذاه تلقـنـه جنـيـة
=نعنبـو جنيتـه ماعنـدهـا مــذرورة
يحسـب ان جنيـتـه جنـيـة المـريـة
=والله ان يبطي ماوصل العالم المشهـورة
الزلامي قـال فـي شعـر النبـط مرثيـة
=شاعر لقاه يسحـب رجلـة المكسـورة
اهملـوا فيهـا وجتـه السكتـه القلبيـة
=وانصدم من عتني به وانصـدم دكتـورة
الله الله يـازمـان صفحـتـه مطـويـة
=مايعوض فية عيـر الحجـة المبـرورة
03-01-2012, 01:43 AM
