لتبليغ الإدارة عن موضوع أو رد مخالف يرجى الضغط على هذه الأيقونة الموجودة على يمين المشاركة لتطبيق قوانين المنتدى

العودة   هوامير البورصة السعودية > >


إضافة رد
 
أدوات الموضوع انواع عرض الموضوع
<
قديم 28-07-2011, 04:04 PM  
#1
صديق المنتدى1
عضو موقوف
 
تاريخ التسجيل: Dec 2007
المشاركات: 863

قصص بني هلال

القصه اللي انا ابي اتكلم عنها عباره عن محصله من عدة روايات عن بني هلال وقصة الجفاف اللي صابهم ومعاركهم وانا المسؤل عن الرواية وما يذكر فيها من احداث وقصائد واعتبر نفسي مصدر طرح هذه القصة بهذا الاسلوب حفظاً وليس كتابه لان اكثر الاحداث سمعتها وحفظتها ولم اجدها في أي مصدر مكتوبه علما ان عندي اربع مصادر من كتب غيرما تمكنت من جمعه من مصادر اخرى

في البدايه ابي اتكلم عن قصة الحب اللي حصلت بين ابو زيد الهلالي واسمه الحقيقي (سلامه) وعليا واسمها كامل عليا بنت الشيخ جابر العبيدي القحطاني
أول احداث القصه يوم شاف ابو زيد عليا اعجب فيها وجن جنونه انهبل جمال وجسم وبنت شيخ قال في نفسه ماخذها ماخذها بس العقبه الوحيده قدامه ان شيخ بني هلال مانع شباب بني هلال ما ياخذون الا من بنات بني هلال (وطبعا عليا بنت الشيخ جابر من عبيده من قحطان )راح لأميرهم واسمه حسن بن سرحان وطلب منه يسمح له يتزوج من عليا
عرض فكره الزواج من عليا على الأمير رفض الامير واصر ابو زيد ألا يتزوجها وقال للأمير انت بس شفها وتعذرني رفض الامير وارسل ناس يشوفونها ويوصفونها له جوه المراسيل ولا مدحوها له يقولون نحيفه ولهي على وصف ابو زيد

رفض الامير مره ثانيه وكرر عليه ابو زيد وطلبه انه يروح يشوفها بعد كثر الالحاح قال الامير بينه وبين نفسه ليه ما اروح اشوف هاللي خذت قلب ابو زيد وابو زيد معروف عنه انه فارس ولا يفكر في الزواج ولا يفكر انه يجي له عيال ابداً

ابو زيد كان يوصف عليا عند الامير حسن بن سرحان يقول عليا إذا وقفت من اوسط البنات بالطول وإذا جلست تكون اطولهن ( يقصد بكلامه أن فخوذها كبار إذا جلست ترفعها ) راح الامير يشوفها واخذ معه واحد اسمه ابو العلا وكان الامير راكب ناقه يوم شافها انبهر من جمالها ما يدري يمشي في أي اتجاه بالعربي ضيع نزل من ناقته وراح يمشي ويردد قصيده يقول فيها :





ابا العلا قدلي مع الدرب ناقتي .......بحسناك والا ناد لي من يقودها
يقولون لي عليا نشاش دقاقـه ......وانا اقول ريان من الغي عودها
ان وقفت دق العسيلي بوركهـا.........وان دنقت ما رده الا نهودهـا
قولو لطراد الهوى يطرد الهوى........وانا كفيلك عن بلاوي حسودها




قولوا لأبو زيد ياخذها


العسيلي هو نوع من الجلد المقوى على شكل حزام وسيع على شكل حجل في الوسط ويقصد بالبيت ان وسطها ضامر مافيه شي يرد الحزام
على كذا يسمح لابو زيد ما لا يسمح لغيره طبعاً هذا ابوزيد الهلالي من قده
تزوجها ابو زيد


وكان معروف عن بني هلال انهم اهل طرب ورقص وفلة حجاج بس مافيه شي يدوم لانه جاهم اسبوع امطار الليل والنهار تصب عليهم ما قدروا يرقصون ولا ياخذون حريتهم من المطر قال لهم واحد( ويقال انها عجوز في اغلب الروايات ) اذا تبون المطر يوقف اسلخوا لكم بقره وهي حيه ويوقف المطر طبعاً هم ماصدقوا خبر سوو اللي قالته العجوز وفعلاً وقف المطر والوقفه الواقفه اخذوا ثمان سنين ما جاهم ولا قطره ولا هب عليهم الهبوب
ومن المواقف اللي صارت بسبب الجفاف ان ابو زيد كان هو وواحد اسمه عزيز ابن خاله رايحين يسقون ابلهم ونزل عزيز في البير يملا الدلو لخاله ابو زيد ( وكان يقال ان عزيز ولد ابو زيد من اخته وهذه المقوله لها قصه معروفه ولذلك سمي ولد خاله ولكن لسنا في سياق ذكرها في هذه القصه وكان ابو زيد لا يعترف به) نزل عزيز في البير مع نزوله قرصته حيه و (ون) منها وسمعه ابو زيد وقال له:




سمعت منك يا فتى الجود ونه .... عساك منها يا فتى الجود سالم



قال عزيز :




انـا سالـم منهـا ولانـي بسالـم ........والراس ما تطوى عليـه الغمايـم
أنا سالم لو ما ازرق الناب عضني......ضربنـي بنابـه واتقـا فالرقايـم
وانا خايف يا خـال هـذي منيتـي ........ومن رافقك يا خال مـا رد سالـم
وحلفت أنا يا خال لروي ركايبـك .....واخلي الماء من على الحوض عايم




قال ابو زيد





يا وليّد قم خم الرشا واحتزم به ........خل اظهرك عن بير فيه الصمايم




ملا عزيز الدلو وطلعه خاله من البير ويوم شاف ابو زيد ان الموت جا عزيز( ون) ابو زيد ويوم سمعه عزيز قال




يا خال خل الـدوح والنـوح خلـه .......واعمل بقبري يا عطيب الضرايـب
خل القبر في راس عيطـاً طويلـه...........وسيفي ورمحي حطهن لي نصايب
أغـدي بنـات الهلاليـه يجنـنـيي ............جذ على قبري بـروس الذوايـب
وداعتـك يـا خـال ورعٍ صغيـرٍ ..........يلعب مع الصبيـان وابـوه غايـب
احذرك انا يا خال عن ضربه العصا ........أو نهـرةٍ تـودع قليبـه حطايـب
وقولوا لبنت امي تغطى وتستحـي .......ليا جولها الخطاب فـوق النجايـب
وقولوا لبنت العـم ترحـل لاهلهـا ........حرم عليها اليوم شـوف الحبايـب



(بنت العم يقصد بها زوجته) مات عزيز ودفنه ابو زيد مثل ما وصاه وصب الدلو اللي طلعه عزير على قبره وقال ابو زيد فيه





دفقت على قبر الهلالـي قربتـه .....وخليتها تسق الرياض المجـادب
وحطيت على قبر الهلالي جوخته......وخليتها تـذرا عليهـا الهبايـب
وحطيت على قبر الهلالي فتخته.......في ما قع يشوفها كـل صاحـب
وعقلت على قبر الهلالي بكرتـه........وخليتها تعتب حـوالا النصايـب



أستمر الجفاف ثمان سنوات وبني هلال يشدون من مكان وينزلون في مكان يدورون الماء ويحفرون حتى في روس الجبال وكل مكان يشدون منه يدفنون فيه من موتاهم من العطش ولهم اثار كثيره في نجد والجنوب ومازالت ابارهم موجوده في كثير من مناطق المملكه وهذا من اكبر الادله على انه كان لهم وجود حقيقي وان القصص والكلام عنهم ليس من الاساطير ولكن استغلت شخصياتهم في كثيرمن القصص



ومن ما قيل بسبب الجفاف ما قاله الامير حسن بن سرحان:





ثمان سنين ما هوا نجـد قطـره .......ولا زلزل الرعد الرزين وزار
ولاهبت الغرى ولاهبة الصبـا ........ولا طار من اشعاف البكار غبار
حفرت فالبيـدا ثمانيـن قامـه .........ودورت انا الجم الغزير وغـار
يانجد وان طاح الحيا فازعجيلنا .......وشبي لنا براس المقوزي نـار
لك الله صبيان النشاما تغيـروا.......بنابٍ ضحوكٍ يعجـب الخطـار




بعد ثمان سنوات من الجفاف ضاعت الحيله عليهم ما فيه أي شئ لرعي حلالهم ولا فيه أي شي يشربون منه قال الامير حسن لابو زيد نبيك تروح تعس ديار تونس وتجيب الاخبار منها لانهم سمعوا ان فيها خير وان ارضها مليئه الخضره والعشب وتشوف فيها حيا والا لا. وكان اختياره لانه يعرف ان ابو زيد اقدر الناس على السفر لتونس وكان السفر لها يستغرق ثلاثه اشهر حسب ما ذكر في قصائد ابو زيد وان شاء الله اذكره في الاجزاء الجايه لاني ما ابي اذكرها مقسمه ولا جاء موقفها اللي قال فيه القصيده

بعد محاولات واقناع وافق ابو زيد انه يروح بس اشترط انه يرسل معه عيال الامير حسن وهم يحيى ومرعي ويونس

اولا لانهم فرسان وثاني لانه يبي يشوف اذا الموضوع مهم عند الامير ولا يهم بمخاطرت ابو زيد فهو بيوافق يضحي بعياله ويخاطر بهم لان الطلب ماهو هين

وافق الامير على شرط ابوزيد وجهز عياله من كل شي يحتاجونه
وكان طريقهم مع الحره في الحجاز وذلك مذكور في قصييده ابوزيد
يقول فيها

سرنا مع الحرات تسعين ليله ,,, نقود الطوعات خلف الجهايم


توجه ابو زيد وعيال الامير لتونس وفي طريقهم مروا على عامر الخفاجي في العراق واللي ايدهم ووعدهم انه يوقف معهم اذا احتاجوه اوا احتاجوا منه شي وتوجهوا من عنده باتجاه تونس واللي كانت فيها قبله بني قابس


وصلوا لتونس وكان حاكمها يقال له خليفه الزناتي


اكرمهم الزناتي احسن اكرام مع انه ما كان مرتاح لهم لانه كان حالم له حلم مخوفه وشايفٍ فيه ان جايهم سحابه من الشرق وتمطر عيهم شوك



ويوم وصل ابو زيد واللي معه لديار بني قابس وعرف انهم جايين من ديار الشرق قال في نفسه أكيد ان لهم علاقه بحلمي وان شي بيصير لي منهم وقال ليه انا ما احبسهم لين اتحقق من صحة كلامهم وبعدين اقرر اطلق صراحهم

وامر بحبسهم والتحقيق معهم


سألوهم من اين انتم جايين ووين رايحين قالوا حنا من ديار عامر وراجعين من الحج ومر بنا الطريق على دياركم

بس الكلام ما كان مقنع ابد ولافيه شي من الصحه

ما صدقوهم وامروا بحبسهم

وبعد مده امر بنقلهم من السجن لقبوا في قصر الزناتي

لانه ما كان متطمن لهم ابد ومازال يحس ان لهم علاقه بالحلم

الزناتي كان له بنت واسمها سعدى وتلقب بالصفيرا وكانت كاهنه تخط على الرمل وتكهن

ومن ما شافته بالخط على الارض انهم بيغزون وبيجيهم ناس يذبحون ابوها وان اللي بيقتل ابوها واحد اسمه ذياب


جتهم سعدى وسالتهم وقالوا لها نفس الكلام انهم حجاج


ضحكت عليهم وقالت يالكذابين معي علمكم انكم ابو زيد ويحيى ومرعي ويونس عيال الامير حسن بن سرحان ما قدروا ينكرون واعترفوا لها
ويوم شافوا ان ما لهم مجال اعترفوا لها علها تساعدهم
وطلبوا منها انها تساعدهم وقالت اساعدكم بس بشرط انكم إذا غزيتوا علينا فيه واحد اسمه ذياب ( ولد اخت ابو زيد) بيذبح ابوي إذا عاهدتوني انكم تزوجونيه اساعدكم قالوا ان ولد اخت ابو زيد صغير ولهوب فارس ولاعمره شارك في حرب لانه وقتها كان عمره صغير على خوض الحروب وما كان له أي فعل وكان ابوه خواف وسيرد قصيده قايلتها ام ذياب في ولدها تنصحه لا يسمع كلام ابوه وتامره انه يعصي ابوه ويروح للحرب قالت صاحب الاسم ذا بيدبح ابوي وتزوجونيه سواء كان ولد اخت ابو زيد او غيره

وافقوا على شرطها وقالت انا بروح لبوي وبقول انك عبد ( تقصد ابو زيد لانه كان اصلع من لبس الدروع واسود من الشمس ) وبقول لابوي ان سجن العبد عيب اترك الاحرار الثلاثه في السجن وفك العبد واكدت لهم انها بتساعدهم وعاهدتهم على ان ابو زيد ليطلع باي طريقه

وقالت لابو زيد اني اذا قدرت اطلعك لا تقول لاحد انك ابو زيد ثم ما يفكك ونبهتته من حيل ابوها وانه ما راح يفكه كذا لانها عارفه ان ابوه ما تطمن لهم ابد واذا اكتشفوا انك ما انت عبد انك برجع للسجن ويمكن اتورط معك
راحت لابوها وقالت له يفك العبد وحاولت انها تقنعه انه عبد وبعد محاولات اقنعته انه يفكه ويراقبه ويتاكد انه عبد


وافق المسكين ما عرف حيلة بنته عليه

بس ما وافق بفكه كذا لكنه امر اشجع فرسان بني قابس ويقال له العلام وقاله انه يراقب كل تحركاته لانه ناوي يسوي له حيله وامره انه اذا اكتشف ان العبد ما طلع عبد يقطع راسه على طول

ويوم راحت تفكه نبهتته وقالت له عن حيلة ابوها وانه مراقب


وكانت حيلة الزناتي انه قال حطوا العبد ( يقصد ابوزيد ) عند القدور وخلوه يطبخ وانت راقبه يالعلام وخلوا الخيل تعرض من قدامه والفرسان يلعبون ان شفت العبد طنش القدور وراح اهتمامه مع الخيل اعرف انه فارس واقطع راسه على طول ولا تناقشه


عرضت الخيل قدام ابو زيد ويوم شاف الخيل والفرسان نسي نفسه وانطنخ معها فارس وشاف الخيل والفرسان ولا له في شغلة القدور






عرضت الخيل قدام ابو زيد ويوم شاف الخيل والفرسان نسي نفسه وانطنخ معها فارس وشاف الخيل والفرسان ولا له في شغلة القدور

جاه العلام وسأله قبل ما يقطع راسه من انت شاف ابوزيد انه تورط ولا له غير الاعتراف قال ابو زيد اقول وتعاهدني ما تذبحني قال العلام اعاهدك قال ان ابو زيد

طبعا العلام مضى منه عهد انه ما يذبحه ولا يقدر يخليه في الديار ويسال ليه ما ذبحته
قال العلام انا الليله بجهز لك مزهب وذلول تنحاش عليها بس تعاهدني انك اذا غزيتونا ما تذبحني ولا اذبحك ودي اشبع من الطراد ومن ذبح الفرسان من قومك وانت اذبح من قومي وانا اعاهدك ما اعترضك وعاهده ابو زيد على انه ما يذبح العلام .


يوم جا الليل ركب ابو زيد الذلول وتوجه لاهله ويقال انه اخذ ثلاثه اشهر من بعد المسافه لين وصل اهله .


يوم وصل ابوزيد لنجد وقابله الامير وشاف عياله مارجعوا وعرف انهم في سجن الزناتي صاح بقومه وامرهم انهم يشدون الرحال بحلالهم وحريمهم حتى ما يذكرون ان وراهم شي يرجعون له او يتحسفون عليه .


ورد احد شعرائهم يقول







رحلنا ولا ابقينا بنجـدٍ حسوفـه
سوى عيلمٍ بيـن اللـوا وزرود
والفين ورد الما والفين صـدره
والفين مـا بيـن العـدام ورود
تراه بواد الشري ياجاهلن بهـا
عليها النواز النايفـات شهـود
ترد لها تسعين من جلـد بكـره
وتسعين مع تسعين جلد قعـود
لا زاد ورده زاد ميـاح جـمـه
عـدٍ ليـا حـرك تـراه يـزود
دفناه عن نـاسٍ تـولاه بعدنـا
شحـاحٍ ولا بالطايـلات تجـود
بذرنا عليه الجود لين امحلت به
سنين القسى ما لجلجن برعـود
ورحنا وعنه النفس ماهيب طايبه
عسانا ليا عاد السحـاب نعـود
عسانا نعود ونبتها يكسي الوطا
ومن عشب ترمسها عليه ورود
غربيها زيزا بها الريـم والمهـا
وشرقيهـا يـذرا عليـه نفـود
عسى إله الكون يسقي ترابهـا
وعليها بدهم الممطـرات يجـود
حيث انها تالد بها شمـخ الـذرا
ونصيهـا للصافنـات مــدود







رحلوا الهلاليه وطبعا معهم حلفائهم الزعابى ( قبلية زعب ) وما خلوا وراهم احد الا عليا مرة ابوزيد الهلالي لانهم قبل لا يرحلون كان فيه مشكله بين اهلها وبين بني هلال وكانت عند اهلها في نفس الوقت ورفضوا انها ترجع لبني هلال لين يجي ابوزيد ويحل المشكله ويوم جاهم ابوزيد بالاخبار وعرف ان عليا عند اهلها تركها على امل انه يرجع لها اذا خلص من مشكله الزناتي وجماعته .

مشت ركايب الهلاليه وخيلهم وكان ابوزيد يردد ابيات يقول فيها








يقول ابو زيـد الهلالـي سلامـه
تجار نجد( ن) هالني كبر زومهـا
يقولون ذا ونقـول لا ثـم ننثنـي
لحاجاتنا ناطا الغلا من حكومهـا
عفا الله عني ليلـه بـت ساهـر
بجو السميراء بت اساهر نجومها
بـت لكنـي شــارب قرقفـيـه
امدفقه فيها الافاعـي سمومهـا
نفسي تمنيني علـى ذبـح خيـر
على غير حق اوهمه من اوهومها
وهو يذبح الكوما الى قلص القـرا
ولا قال يكفي درها عن لحومهـا
ولولاه مـا بتنـا بنجـد عشيـة
ولا وقفت زلباتنا فـي حزومهـا
وهو حسن الشده وحسـن الرخـا
وهو اميرنا في جميـع علومهـا
ولو العجوز العامريه مـا ارثـت
لنا حسـن كنـا جميـع نلومهـا







في طريقهم مروا على العراق وكان فيه حليف لهم يقال له عامر الخفاجي وكان امير قبيلته وكان له قصر معروف باسم الاخيضر نزلوا عند الخفاجي ماكتب لهم من ايام واكرمهم ويوم ننوا الرحيل الى تونس ما قدر الخفاجي يصبر يوم شاف الخيل والفرسان وشاف بنات بني هلال حب انه يشارك معهم ويكسب سمعه جهز نفسه ومن معه من ربعه ويوم نوا يمشي منعته امه ولا امتنع وقامت تلحقه وتلح عليه يجلس ما سمع كلامها

وقال فيه واحد من ربعه




ولد الخفاجي راح وامه تـذوده
خذن قلبه بالمنـى والمواعيـد
يبغى يطلع مع هل الخير جوده
ورث لنا قصر الاخيضر وعربيد





( عربيد ) ثعبان ضخم كان يربيه الزناتي في قصره


كما ان بني هلال قبل الدخول على الزناتي اختلفو على من يتكلم امام الزناتي

حيث اعتذر ابوزيد بقوله ان الزناتي لاشافني اسود اخذها علي حجه،

وبعد اعتذار ذياب بقوله انا ينعقد لساني بعد خمسين محراف

ولكن وقع الاختيار على ابوزيد وكان دون الزناتي باب لايدور الا بزند اربعين رجال ،

فتح ابوزيد الباب ودخلوا على الزناتي

وقال /



سلام على الشبان والشيب والقنا
سلام منـا ياذيـاب المغاربـه



فقال الزناتي




لاهوب لاهلا وهـوب مرحبـا
من وين جيتوا ياكلاب الشعايبه



فقال ابوزيد




صيروا لنا حضر ٍ وحن بدوُ لكـم
نرعى سوى والعشب ساب سايبه



فقال الزناتي /




يالعبد يالخنزير يامخنز القفى
وشبك تكلم كن الاسود غايبه



فقال ابوزيد بعد ان غضب




انا اكفيهم في هاذي وفـي مثلهـا
ولا جاء نهـار كاثـرات نشايبـه
غير الوعد من بينّا شـرق قابـس
ومن غاب منّا حسّن الموس شاربه




وكان الزناتي اذا جلس يربط راس الشنب كل واحد في فرس منّا ومنّا




رجع الهلالي لربعه وبلغهم ان الزناتي يتحدى ولا يبغى الصلح


جهزوا الهلاليه انفسهم وخيلهم وعدتهم وعزلوا له تسعين الف من فرسانهم وفي مقدمتهم الامير حسن بن سرحان وابو زيد الهلالي وخلوا بعض الفرسان عند الحلال والحريم والعبيد حمايه واذا احتاجوهم ارسلوا لهم .

هجموا على الزناتي وربعه واستمرت معاركهم شهر ما ردوا خبر للي وراهم من فرسان ولا بلغوا اهلهم عن كل اللي يصير معهم

بعد شهر قتل اكثر الفرسان من الطرفين وارسلوا الهلاليه مرسولهم يستنجد بباقي الفرسان وكان المرسول عبد من عبيد بني هلال واسمه سعد

اول ما وصل سعد لربعه استقبله ذياب بن غانم وكان صغير ما عمره شارك في معركه
قال ذياب




ياسعد خبرني ولا تكـن مـا جـرا
عن الخيل والفرسان من جا خيارها
انشدك عن سابق بدير بـن وايـل
هي من طوال الخيل او من قصارها



قال سعد




يا سيدي سابق بدير بن وايـل
ضربت بسيف هد عالي فقارها



يقصد انه قتل

قال ذياب




انشدك عن عيال الزعابى الثلاثه
هم عزوتي يا سيدي من خيارها



قال سعد




يا سيدي كل الثلاثـه ذبحـوا
ما جيتك الا قد توافت عمارها



قال ذياب




انشدك عن ولد الخفاجي عامر
عساه سالم من بلاوي اخطارها



قال سعد




ثلاثين يوم( ن ) حام الترك عامر
ولك الله ما يعرف ليلها من نهارها
ومن ذبحته كل النسا زاد حزنهـن
يهلن على قبر الخفاجي عبارهـا



قال ذياب




لا حلكـم لا بلكـم وابــل الحـيـا
يقطع نجوع ( ن ) ما ثنت دون جارها



زعل ذياب وضرب العبد بعقب الرمح وجهز نفسه للغزو مع باقي الفرسان وكان ابو ما له غيره وكان كبير سن وقعد يوصي ذياب ويقول له تجنب الزناتي والعلام وهو يوصيه سمعته ام ذياب وردت عليه بها الابيات




لا تردي ابني يا هدانـي مقصـر
عساك عن بـرد الجنـان تغيـب
عساك يا ابني وان تداريت عنهـم
شلفاه تخطيهـم وفيـك تصيـب
تباعد عنا يا ذيـاب بـن غانـم
له حربة ( ن) تدع الوليد يشيـب
له حربة ( ن) ما ياقع الطل فوقها
عشاه مـن دم الرجـال غصيـب





واضاف احد الاخوان هذه المعلومه


وللست متأكد منها

وهي



العلام بعد ان شك من ابوزيد قال لابنته


ياخوفتي من ذالعبد يابنتي ‘‘ لونه ابوزيد المكّار

فقالت




يابوي لاتذبحون ضيوفكم
ياتيلكم وسط القبايل عار



قال




ياخوفتي منذ العبـد يابنتـي
جنوبه من لبس الدروع كبار



فقالت




يابوي ذا عبد على باب تاجر
جنوبه من مكل العصيد كبار



وصولوا باقي فرسان بني هلال للمعركه واشتبكوا مع بني قابس وكان من اشجعهم ذياب بن غانم وكان له فعل مشهود لانه كان يقترب من قصر الزناتي ويرهب فرسانه اللي كانوا حارصين قصره لدرجة انهم اذا شافوه كانوا يهربون منه حتى ان المساجين ( يحيى ومرعي ويونس ) يشوفونه ولا يعرفونه لانه ما هو من فرسانهم المعروفين وفعله فعل فارس وكانوا يسالون سعدى الصفيرى عنه وهي ما تعرفه قالوا لها روحي واسالي أي واحد من بني هلال يقول لك منهو راح ووقفت واحد من بني هلال وقالت له




وقف نبي ننشدك يا شايع النبـا
عن الخيل حتنا اليوم موم شليلها



قال




ما غير فارس الدهما ذياب بن غانم
حامي خفاف الخيل ملحـق ثقيلهـا



جتهم وقالت لهم انه ذياب بن غانم ما صدقوها لانهم يوم راحوا لتونس ما كان لذياب أي فعل ولا يعد من الفرسان قالوا لها روحي واسالي واحد غير اللي سالتيه الاول

راحت ووقفت واحد وقالت له




وقف نبي ننشدك يا شايع النبا
عن الخيل جتنا بالرجال شرود



قال الهلالي




ماغير فارس الدهما ذياب بن غانم
وترى الشوف خرز والكلام يكـود



الزناتي في ها الوقت كان حاط له كلاليب على امتداد قصره يعرفها هو ويبتعد عنها ودائما تخطف الفرسان ويعود عليه الزناتي ويقتله حاول الزناتي انه يستطرد لذياب ( يحاول ان ذياب يطارده ) يبي يجره للكلاليب حتى تصيب ذياب ويطيح من فرسه ويرجع عليه ويقتله وفعلا استطرد لذياب وطارده ذياب بعد مسافه انثنا الزناتي على ذياب لانه توقع انه طاح في الكلاليب لكن تفاجا ان ذياب وراه ما طاح وضربه ذياب بشلفاه اللي كان مسميها ( سم ساعه ) وطاح الزناتي وتجمعوا عليه فرسانه وخلصوه قبل لا يموت ودخلوه قصره بين الحياة والموت وقال قصيده يشرح فيها غدرر بنته وما صار من بدايه قصته مع الهلاليه وهو يقول








يقـول الزناتـي والزناتـي خليـفـه
نفس الفتـى لا بدهـا مـن زوالهـا
حلمت ليا ناش(ن ) من الشرق مزنه
تمطر كمـا شـوك البلنـزا خيالهـا
مشت خميس( ن) وامطرت يوم جمعه
وهلت علـى قومـي مقـدم فعالهـا
مطرها السبايـا والصبايـا وبرقهـا
سيوف( ن) تلظا في يمانـي رجالهـا
ياليتني مـا صـرت شيـخ لقابـس
واهني نفس ( ن) ما عليها ولا لهـا
واهني نفس(ن) ما كلت مـال مسلـم
ولا اخلطـت مـال اليتامـا بمالـهـا
نظرت بقومي نظرة (ن) مـا تسرنـي
وجيـه العـذارى طلقوهـا رجالهـا
كبـار اللحـا لا بـارك الله باللحـي
صغار اللحي شبـوا بقومـي فعالهـا
الا وابـلادي زينـة المـا مريـفـه
مدعوجـة (ن) بالنيـل تنـدا جبالهـا
مساس عن الرمضا دكاك عن الحصا
والبق والبرغـوث مـا جـا بجالهـا
واشيب عينـي مـن عريـب تنزلـوا
على مجنب البطحـا وبنـوا حلالهـا
بنـوا حـلال مـن حلالـي قريـبـه
بنـوا حـلال شـاق عينـي دلالهـا
تـرى خيلنـا تسعيـن الـف نعدهـا
وتذكـر لنـا خيـل الهلالـي مثالهـا
ولوتجتمـع خيـل الهلالـي وخيلنـا
ابـا زيـد يركيهـا ويركـي مثالهـا
خان الصفيـرا يـوم خانـت بابوهـا
ولا بنـت الا فـان ابوهـا دلالـهـا
تشير بربط القـوم واطـلاق عبدهـم
واثـر عبيـد القـوم حامـي ثقالهـا
اثـر عبيـد القـوم زيـزوم سربـه
يجـر القنـا جـر السوانـي حبالهـا
يشل الدمي شل الدلـي يـوم تمتلـي
لاماحهـا الزعـاب ثـم ارتكالـهـا
سيفه تعايـوا عنـه صنـاع دمشـق
ليـا ولا جمجمـة الـراس شالـهـا
لكن عوى شامان في طوس روسنـا
عوا ذيبة ( ن) تعوي لذيب (ن) عوالها
وانا شاهد(ن) للعبد في ربـع هدتـه
ثمانين مـن قومـي قلايـع رجالهـا
هذا لـو ان العبـد قـد هـد مثلهـا
علـي كـان التـرك تيتـم عيالهـا
اثـره اميـر ولـد اميـر مـجـرب
ليـا هـد تعطيـه السبايـا كفالهـا
ترى ما يجي عني مثل حذفه العصـا
واسرع مـن دور الرحـا اشتغالهـا
ولولا بخـط الرمـل شيفـت منيتـي
بسيـف ذيـاب قـد لابازيـد ازالهـا
هو قـدم قومـه وانـا قـدم قومـي
وهو فهـد القنـاص وانـا غزالهـا
حذرا من اللي كفيـت القـدر وجهـه
لا جا جنوب الخيل صيـروا شمالهـا
اللي قلـع حـدري ثمانيـن سابـق
كبيشات ما في نجـد ربـي امثالهـا
واللي قلعت حدره مـن الخيـل تسـع
والعاشره بالسيف انـا زلـت حالهـا
اليا اعقر لـه سابـق جـاه مثلاهـا
واليا اعقر لـي سابـق جـا مثالهـا
ان امهلت دنـاي وادركـت هقوتـي
لازيل الصفيرى عـن حيـاة تنالهـا
مهبول يا مهبول مـن يامـن النسـا
ومن يامن الحرمه الا اقفـت بفالهـا
ليـا بغـت درب الـردا مـا يكودهـا
تاطـاه لـو انـه حماقـا رجالـهـا







مااااااااااااااااااااااات الزناتي


ورثته بنته سعدى في قصيده تقول فيها








تقول فتاة الحيّ سعدىiوهاضهـا
لها في ضعون الباكييـن عويـل
أيا سايلٍ عن قبر الزناتي خليفـه
خذالنعت مني لاتكـون iiهبيـل
تراه العالـي الـواردات وفوقـه
من الربط عيّساوي بناه iiطويـل
وله يميل الغور من سايل النقا به
الـواد شـرقٍ والبـراع دليـل
أيا لهف كبدي يالزناتـي خليفـه
قد كان لعقـاب الجيـاد iiسليـل
قتيل لفتى الهيجاء ذياب بن غانم
جراحه كأفـواه المـزاد تسيـل
ياجارنا مـات الزناتـي خليفـه
لاترحـل ألا ان يريـد رحـيـل

صديق المنتدى1 غير متواجد حالياً   رد مع اقتباس
 
 

قديم 28-07-2011, 11:47 PM   #2
صديق المنتدى1
عضو موقوف
 
تاريخ التسجيل: Dec 2007
المشاركات: 863

رد: قصص بني هلال

للرفع--------
صديق المنتدى1 غير متواجد حالياً   رد مع اقتباس
قديم 29-07-2011, 12:52 AM   #3
مسيار
عضو هوامير المميز
 
تاريخ التسجيل: May 2011
المشاركات: 3,305

رد: قصص بني هلال

لهم ملعب مشهور بين أوثال والعيون غرب بريدة - القصيم -
يسمى ملعب بني هلال
شكرا جزيلا للراوية

مسيار غير متواجد حالياً   رد مع اقتباس
قديم 29-07-2011, 01:39 AM   #4
بندرالاول
عضو هوامير المميز
 
تاريخ التسجيل: May 2009
المشاركات: 3,183

رد: قصص بني هلال

قصه جميله سمعنا جزاء منها من قبل خصوصا الوصف


انت ذكرت ان عشيقت ابو زيد هي عليا بنت الشيخ جابر العبيدي القحطاني


من قحطان ,,,

ولكن لم تذكر نسب ابو زيد الهلالي ؟؟؟ من هي قبيلة ابو زيد الهلالي الان






بندرالاول غير متواجد حالياً   رد مع اقتباس
قديم 29-07-2011, 01:58 AM   #5
بيرق الاسهم
عضو هوامير المميز
 
تاريخ التسجيل: Feb 2009
المشاركات: 849

رد: قصص بني هلال

الله يرحمك ياجدي كان يحب اني اقرأ له قصص الهلاليين من كتاب "تغربة بني هلال"
والحلو في الموضوع اني كنت اقرأ واغلط وهو يعدل لي ويسبق القصة ويعلمني الباقي ويقول القصيد لأنه شوي صعب علي الله يرحمه رحمة كثر ما امطرت السماء وكثر الرمل وكثر البشر والحجر الله يرحمك ياجدي ربيتني ورحمت صغري وضعفي

بيرق الاسهم غير متواجد حالياً   رد مع اقتباس
قديم 29-07-2011, 02:00 AM   #6
سدير نت
عضو موقوف
 
تاريخ التسجيل: Jul 2006
المشاركات: 3,984

رد: قصص بني هلال



اسمحلى قصه ابز زيد الهلال تسويف فى تسويف وقصص خيال ومقوله عندنا ان وشى ديره بسدير ديارهم وبه كنز لهم يغنى كل البشر

مقوله مشهوره ومتداوله من قديم على العموم بما انك باحث ومؤرخ كم سوال على الطاير

فى اى تاريخ حصلت هذه القصه تقريبا قصه ابو زيد الهلال والامير حسن

فى اى عام نزحوا وما اسباب نزوحهم من نجد واين كانت الوجهه

هل اطوالهم مثلنا ام كما يقال عمالقه من عشرين ذراع وفوق

طيب ودى اهضم اذا كان ابو زيد من نجد وشلون عشق قحطانيه فى الجنوب

واسم عليا بنت الشيخ جابر العبيدى القحطانى وش مصدرك يؤكد ان هذا اسمها



سدير نت غير متواجد حالياً   رد مع اقتباس
قديم 29-07-2011, 02:08 AM   #7
بندرالاول
عضو هوامير المميز
 
تاريخ التسجيل: May 2009
المشاركات: 3,183

رد: قصص بني هلال

اقتباس:
المشاركة الأصلية كتبت بواسطة سدير نت مشاهدة المشاركة

اسمحلى قصه ابز زيد الهلال تسويف فى تسويف وقصص خيال ومقوله عندنا ان وشى ديره بسدير ديارهم وبه كنز لهم يغنى كل البشر

مقوله مشهوره ومتداوله من قديم على العموم بما انك باحث ومؤرخ كم سوال على الطاير

فى اى تاريخ حصلت هذه القصه تقريبا قصه ابو زيد الهلال والامير حسن

فى اى عام نزحوا وما اسباب نزوحهم من نجد واين كانت الوجهه

هل اطوالهم مثلنا ام كما يقال عمالقه من عشرين ذراع وفوق

طيب ودى اهضم اذا كان ابو زيد من نجد وشلون عشق قحطانيه فى الجنوب

واسم عليا بنت الشيخ جابر العبيدى القحطانى وش مصدرك يؤكد ان هذا اسمها


الاخ سدير نت

ابوزيد الهلالي من الحجاز وليس نجد وقبيلته بطن من بطون هوازن


هوازن تجمع السبعان والسهول وعتيبه ......

بندرالاول غير متواجد حالياً   رد مع اقتباس
قديم 29-07-2011, 02:25 AM   #8
saltano
عضو هوامير المميز
 
تاريخ التسجيل: Oct 2006
المشاركات: 226

رد: قصص بني هلال

يذكر التاريخ انهم كانو جيش القرامطة
saltano غير متواجد حالياً   رد مع اقتباس
قديم 29-07-2011, 02:36 AM   #9
almohab
عضو هوامير المميز
 
تاريخ التسجيل: Sep 2008
المشاركات: 357

رد: قصص بني هلال

اقتباس:
المشاركة الأصلية كتبت بواسطة مسيار مشاهدة المشاركة
لهم ملعب مشهور بين أوثال والعيون غرب بريدة - القصيم -
يسمى ملعب بني هلال
شكرا جزيلا للراوية
من يومهم زعماء

almohab غير متواجد حالياً   رد مع اقتباس
قديم 29-07-2011, 03:21 AM   #10
عقيد القوم
مشرف منتديات هوامير
 
تاريخ التسجيل: Jan 2007
المشاركات: 4,804

رد: قصص بني هلال

احسنت وبارك الله فيك

سيره بني هلال له من الصولات والجولات في التاريخ

اذكر احد شيبننا يذكر كتاب يرو ي قصه سيره بني هلا ل الحقيقيه وابو زيد

اسمه الكتاب ( رجل اهمله التاريخ وعاش في وجدان الشعب )

مطلع قصيده الامير حسن بن سرحان

رحلنا ولا ابقينا بنجـدٍ حسوفـه
سوى عيلمٍ بيـن اللـوا وزرود
والفين ورد الما والفين صـدره
والفين مـا بيـن العـدام ورود
تراه بواد الشري ياجاهلن بهـا
عليها النواز النايفـات شهـود

اللواء اللي هي الان محافظه بقعاء في منطقه حايل

وزرود عروق نفود شمال محافظه بقعاء , وشري هي قريه تبعد عن بقعاء 120 كيلو

على طريق القصيم حائل

فقط اضافه للقصه والله اعلم

 
التوقيع - عقيد القوم

عقيد القوم غير متواجد حالياً   رد مع اقتباس
قديم 29-07-2011, 03:28 AM   #11
xudx
عضو هوامير المميز
 
تاريخ التسجيل: Oct 2007
المشاركات: 507

رد: قصص بني هلال

احسهم اسطوره مثل الف ليله وليله

مافيه ديره من ديار المملكه الا ويقولون لاي بير قديم او أثر قديم هذا سواه بني هلال ؟؟؟؟؟؟؟؟ صاروا يأجوج ومأجوج مو قبيله
بعدين باي عصر كانوا موجوديين ؟؟؟؟؟؟؟

xudx غير متواجد حالياً   رد مع اقتباس
قديم 29-07-2011, 03:33 AM   #12
Dr abu saad
عضو هوامير المميز
 
تاريخ التسجيل: Dec 2006
المشاركات: 4,975

رد: قصص بني هلال

اقتباس:
المشاركة الأصلية كتبت بواسطة بندرالاول مشاهدة المشاركة
قصه جميله سمعنا جزاء منها من قبل خصوصا الوصف


انت ذكرت ان عشيقت ابو زيد هي عليا بنت الشيخ جابر العبيدي القحطاني


من قحطان ,,,

ولكن لم تذكر نسب ابو زيد الهلالي ؟؟؟ من هي قبيلة ابو زيد الهلالي الان





بني هلال نزحو لافريقيا وهم في الجزائر وغيرها وهم ابناء عمومه لسبيع والسهول ويرجعون لعامر بن صعصعه

Dr abu saad غير متواجد حالياً   رد مع اقتباس
إضافة رد






مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] معطلة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
المحكمة العليا تدعو إلى تحري رؤية هلال رمضان مساء السبت المقبل ثلج حار منتدى الأسهم السعودية 2 27-07-2011 08:15 PM
عااااااجل ايقاف بن همام مدى الحياة ههههههااااي زمن الفتن منتدى ساحات الهوامير المفتوحة 5 24-07-2011 12:38 AM
ابن همام مجد+ منتدى هوامير الرياضي 0 09-07-2011 12:01 AM




07:48 AM


الاعلان بمنتدى هوامير البورصة
تشغيل وتطوير افاق الإقتصاد
Powered by vBulletin® Version 3.8.7
Copyright ©2000 - 2017, vBulletin Solutions, Inc.
جميع المواضيع و الردود المطروحة لا تعبر عن رأي المنتدى بل تعبر عن رأي كاتبها وقرار البيع والشراء مسؤليتك وحدك

بناء على نظام السوق المالية بالمرسوم الملكي م/30 وتاريخ 2/6/1424هـ ولوائحه التنفيذية الصادرة من مجلس هيئة السوق المالية: تعلن الهيئة للعموم بانه لا يجوز جمع الاموال بهدف استثمارها في اي من اعمال الاوراق المالية بما في ذلك ادارة محافظ الاستثمار او الترويج لاوراق مالية كالاسهم او الاستتشارات المالية او اصدار التوصيات المتعلقة بسوق المال أو بالاوراق المالية إلا بعد الحصول على ترخيص من هيئة السوق المالية.