logo

هوامير البورصة السعودية > الاقسام الرئيسية لموقع هوامير البورصة > ساحات الهوامير المفتوحة

اول زيارة لمصر عشان أدور لأبوي



صفحة 1 من 6
1
2
3
4
5
6
أدوات الموضوع
قديم 24-01-2020, 06:46 PM
  المشاركه #1
شرقااووي
عضو هوامير المميز
تاريخ التسجيل: Sep 2011
المشاركات: 973
 


اول زيارة لمصر عشان أدور لأبوي

السلام عليكم ورحمة الله وبركاته
محدثكم عمره ٣٢ سنة أكبر اخواني

ابوي له سنتين يتردد على مصر يروح شهر ويرجع يقعد ٥ او ٦ شهور ثم يروح مصر شهر شهرين ونفس الطريقة
المره هذي له اربع شهور في مصر
كنت بعملي
فجأه اختي دقت علي تقول حلمت في ابوي حلم بشع وخايفة عليه ومايرد وقتها الساعة ١٠ الليل

أعتراني الخوف والرعب وحاولت اهدأ وأهدئها لكن كل مال الفكرة تصير مرعبه اكثر واكثر خصوصا عندما استحضرت جميع الاخبار اللي قد قرأتها وهي عبارة عن قتل وخطف في مصر لأجل النقود+السكري اللي مصاب فيه واعرفه مايحب المستشفيات

ركبت الطيارة ومافي جيبي الا ١٠٠٠ ريال وهي كل ماأملكه.

توجهت للقاهره واول مانزلت شريت شريحة وتواصلت مغ اخواتي وارسلوا لي اسم المقهى اللي دايم يجلس فيه ركبت القطار وعلى الاسكندرية، طبعا كل هالوقت اتصل فيه ومايرد
من ١٠ الليل وقت خروجي من عملي الى وصولي القاهره الساعة ٦ الصباح

وقبل اوصل إلحي اللي هو فيه بالأسكندرية رد علي وانصدم من جيتي وبنفس الوقت فرح فيها وانا قريب منه وقابلته
حضنته وسلمت على راسه ويده وتطمنت عليه

وشفت حاله أطيب من حاله بالسعودية بمليون مرة

ابوي متقاعد من العسكرية بخدمة ٢٠ سنة بطلب منه.

خرج منها مكتئب وتعبان مايغادر سريره الا للمسجد ويرجع وعنده أرق ماينتهي.

أبوي بسيط واجتماعي وأي مكان يجيه ينحب بسرعة

اكتشفت ان ابوي لقى نفسه بمصر لقى نفسه بين الناس الطيبه
كل ماخشيت القهوة لقيت الناس متجمعه حوله يضحكون ويسولفون بمختلف الاعمار
ليبيين مصريين سعوديين
الى الان ٥ ايام معاه انعزمت عند عائلتين مصرية في بيوتها
قاعد اراقب حياته هنا وانقلها لأهلي بالسعودية واطمنهم
يصلي الفجر بالمسجد ويفطر بمحل بسيط
ويروح لقهوة داخل حواريها لمدة ساعه او ساعتين ويرجع الشقة
وبعد كل صلاة نفس الطريقة ومايجي الساعة ٩ الليل الا وهو نايم
مستاجر شقه بسيطه ب٣٥٠٠ جنيه
شفت بوجهه الراحه اللي يفقدها بالسعودية

تو دريت من اهل الحي انه ساعد ناس بنظر اهل الحي مايحتاجون مساعده زي اللي رامينه عياله وعايش في قراج بعد ماكان يملك شقة ،المصريين اللي قراب من ابوي عارضوا هالمساعدة
بنظرهم لايستحق المساعده لان اولاده موجودين ويقولون رغم ان عياله رامينه اذا حصل قرشين يروح يودي هالقرشين لعياله ومقهورين من تصرفه
ابوي يرفض هالمنطق ويصرّ ع المساعده ويقول هذا مسكين وطيب.
ويقول ((قلب الابن على الاب حجر وقلب الاب على الابن انفطر))
اعمامي يتصلون على ابوي قدامي يرمون عليه كلام لاذع بسبب انه جالس بمصر فترة طويلة وفيها تشكيك باخلاقه من بعيد لبعيد ويتحملهم وانا اعرفه شجاع جدا جدا جدا ويقدر يرد وانقى واطهر من الافكار اللي ماخذينها عن ابوي عشانه بمصر.

ابوي مسلم والدتي راتبه التقاعدي ٣٦٠٠
وجالس بمصر ع السعودة ٢٠٠٠
مره احول له ٥٠٠ ومره ١٠٠٠ ومرات انساه
وانا اكتب لكم هالكلام
احس بالعار والحرج والخجل من نفسي
كيف كنت انساه بعض الشهور وهو عايش احلى ايامه بالاسكندرية.
وعدت نفسي اعوضه قد مااقدر
ووعدت نفسي اوقف بوجه أي واحد من عايلتنا يطالبه بالرجوع
اتمنى انه ما يرجع لاني ابغاه سعيييد ومبسوط
العمر ذا اعرف ان الانسان فيه يشعر بالوحدة
ومين مايشعر بالوحدة؟اعتقد انه وباء العصر الحديث

اكتب هالموضوع عشان اقول لكم اني افتخر فيه فخر كبير.
يارب قدرني اني اسعده واعوضه

اتذكر وانا صغير ساكنين بشقة
كان ساكن معنا عايله مصرية من الصعيد
باولاادهم كنا نطلع مع بعض دايم
اذكر ابوي صك واحد منهم كف اسمه محمود كان يبكي بكاء الدلع ومايسكت بالسيارة وابوه الصعيدي مكمل السالفة مع ابوي ولا كأن صار شي من التقارب بيننا.

اذكر سافرنا مصر انا وابوي قبل ٢٠ سنة
وين مارحنا السكن ببلاش الاسكندرية والقاهره والصعيد اغلب الوقت لان اكثر اصدقائه صعايدة
وكنت اذكر يجلسون معه سعوديين ربي منعم عليهم يبغون يعطونه مفاتيح شققهم باماكن سياحيه بمصر ويرفضها وكانوا يرسلون ابنائهم بسيارات جديدة ياخذوني ويمشوني وانا صغير

اذكر وانا صغير ضيفتنا عائلة بالقاهره
لقينا سعودي عندهم مخاوي احد بناتهم ع اساس خطبه
فترة قصيره والسعودي ذا اختفى من عندهم
يوم كبرت سالت ابوي عنه
قال: هذا كان يستغل البنت ع اساس بيتزوجها بحكم عادات المصريين عادي، وبعدها تفاهمت معه بطريقتي وخليته يبعد عنهم.
اذكر ان ابوي وطد علاقته فيه لدرجه ينامون سوا
ماكنت ادري ان ابوي يبغى يشوف وش في بطنه.

عامل القهوة يعلمني بسالفة ويضحك
يقول ابوك صلى العصر وجا القهوة معاه ١٥ فلاح لقاهم بالمسجد وعزمهم ع شاهي، قاعد اتخيل وهم يمشون ورا بعض من المسجد للقهوة
يقول الحارة تجمعت ع القهوة يحسبونها خناقة ويقول المصري بقى ده هجوم التتار يامحمد.

اعذروني على الاطالة ولكن عارف ان هالمكان اكثر مكان بالشبكة العنكبوتية يليق اكتب فيه عن ابوي، بينكم.


استودعكم الله واشكركم على القراءة.
الموضوع الأصلي : اضغط هنا    ||   المصدر :

ساحات الهوامير المفتوحة
 
  
قديم 24-01-2020, 06:57 PM
  المشاركه #2
ابوبدرر
عضو هوامير المميز
تاريخ التسجيل: Dec 2011
المشاركات: 3,253
 



الله يسعده ويهنيه في ماتبقى من ايام حياته

مصر حلوه واهلها ينحبون وهي اقرب بلد للمتقاعدين غير اندنوسيا البعيده





قديم 24-01-2020, 07:00 PM
  المشاركه #3
تؤبر ألبي
عضو هوامير المميز
تاريخ التسجيل: Sep 2019
المشاركات: 1,139
 



اقتباس:
المشاركة الأصلية كتبت بواسطة ابوبدرر
الله يسعده ويهنيه في ماتبقى من ايام حياته

مصر حلوه واهلها ينحبون وهي اقرب بلد للمتقاعدين غير اندنوسيا البعيده
:hawam er5612



قديم 24-01-2020, 07:01 PM
  المشاركه #4
شرقااووي
عضو هوامير المميز
تاريخ التسجيل: Sep 2011
المشاركات: 973
 



اقتباس:
المشاركة الأصلية كتبت بواسطة ابوبدرر
الله يسعده ويهنيه في ماتبقى من ايام حياته

مصر حلوه واهلها ينحبون وهي اقرب بلد للمتقاعدين غير اندنوسيا البعيده
اللهم امين ويسعدك ويهنيك.
اشكرك على هالدعوة الجميلة.

اكتشفت ان له اصدقاء تعرف عليهم بمصر من كل مناطق المملكة وزيه
يرجعون بلدهم يجمعون لهم قرشين ويرجعون مصر يجلسون شهور.



قديم 24-01-2020, 07:13 PM
  المشاركه #5
daayem1
عضو هوامير المميز
تاريخ التسجيل: Mar 2007
المشاركات: 11,685
 



الله يسعد ابوك ويهنيه ويطول بعمره على الطاعه ويحفظه من كل شر ويعينك انت واخوانك على البر به
انا افكر اشتري شقه بمصر واسوي مثل ابوك بس العيال توهم صغار



قديم 24-01-2020, 07:19 PM
  المشاركه #6
شرقااووي
عضو هوامير المميز
تاريخ التسجيل: Sep 2011
المشاركات: 973
 



اقتباس:
المشاركة الأصلية كتبت بواسطة daayem1
الله يسعد ابوك ويهنيه ويطول بعمره على الطاعه ويحفظه من كل شر ويعينك انت واخوانك على البر به
انا افكر اشتري شقه بمصر واسوي مثل ابوك بس العيال توهم صغار
ويارب يحفظ لك عيالك ويصلحهم ويرزقك برهم ويهنيك ويسعدك.

صارت فكرة امتلاك شقة بمصر رقم ١ بعد ماكنت ناوي اشتري له سيارة.
بس انتظر قرضي يخلص باقي له سنة ونص.
ويارب يحفظه لنا ويحفظ لكم اهاليكم ومن يعز عليكم عشان اقدر افرحه بهالشي.



قديم 24-01-2020, 07:20 PM
  المشاركه #7
المتوكل101
عضو موقوف
تاريخ التسجيل: Aug 2018
المشاركات: 2,099
 



المصريين من أطيب الشعوب العربية



قديم 24-01-2020, 07:21 PM
  المشاركه #8
آنسـي
عضو موقوف
تاريخ التسجيل: Sep 2019
المشاركات: 3,272
 



ماشاءالله ،،، الله يحفظلك والديك ويرزقهم بركم
.... فضفضه جميله ....
ان شاءالله اروح مصر بعد رمضان
نفسي اروح لها من قبل وانت زودت الشوق .



قديم 24-01-2020, 07:25 PM
  المشاركه #9
ابوتفليقه
عضو موقوف
تاريخ التسجيل: Feb 2010
المشاركات: 6,797
 



المصريين مالهم امان خله يرجع احسن له




قديم 24-01-2020, 07:27 PM
  المشاركه #10
التيسير
عضو هوامير المميز
تاريخ التسجيل: Oct 2019
المشاركات: 2,302
 



الله يحفظ لك ابوك

لازم كل فترة واحد يزوره ويروح له مايصير تتركونه لحاله



قديم 24-01-2020, 07:30 PM
  المشاركه #11
شرقااووي
عضو هوامير المميز
تاريخ التسجيل: Sep 2011
المشاركات: 973
 



اقتباس:
المشاركة الأصلية كتبت بواسطة المتوكل101
المصريين من أطيب الشعوب العربية
أنا اشهد امام الله بذلك
رغم الفقر مبتسمين

اقتباس:
المشاركة الأصلية كتبت بواسطة آنسـي
ماشاءالله ،،، الله يحفظلك والديك ويرزقهم بركم
.... فضفضه جميله ....
ان شاءالله اروح مصر بعد رمضان
نفسي اروح لها من قبل وانت زودت الشوق .
ويحفظ لك من تحبّ
حبيتها وانا مارحت فيها مكان، مع ابوي للقهوة رايحين جايين او اطلع ع وحدي ع البحر
هواء بحرهم يرد الروح.
امس طلعت مع تاكسي يرجعني من مطعم بعيد
وحسابه ٥٠ جنيه
ماشين ونسولف وانبسطنا سوالف
نسينا انفسنا وعدينا مكان سكني بكيلوات كثيره
وتاسف لي
وقال:انا انبسطت معاك نادر تلقى واحد ع الجو
ورجعني ورفض ياخذ زيادة عن حقه يقول انا انبسطت معاك وهذا يكفي.



قديم 24-01-2020, 07:34 PM
  المشاركه #12
ابوبدرر
عضو هوامير المميز
تاريخ التسجيل: Dec 2011
المشاركات: 3,253
 



كل بلد فيها الطيب والحرامي وكل المواقف تعتمد على حرص الانسان وطريقة تعامله مع الغير

اما بخصوص شراء شقه في مصر فلا انصح به ابدا ، استأجر شقه مفروشه بالشهر الف ريال افضل مائة مره من الشراء وعدم ضمان ماتملك



صفحة 1 من 6
1
2
3
4
5
6



الكلمات الدلالية (Tags)

لأبوي

,

لمصر

,

أدور

,

زيارة

,

عشان


«

للجادين فقط ........

 |

‫رئيس وزراء قطر المستقيل: سنندم على مجيء الأتراك.. وهل سيخرجون؟ فتم طرده‬

 »

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
BB code is متاحة
كود [IMG] متاحة
كود HTML معطلة
الانتقال السريع

هوامير البورصة السعودية - الأرشيف - الأعلى


09:02 PM

images

Powered by vBulletin® Version 3.8.11
Copyright ©2000 - 2024, vBulletin Solutions, Inc.

جميع المواضيع و الردود المطروحة لا تعبر عن رأي الموقع بل تعبر عن رأي كاتبها وقرار البيع والشراء مسؤليتك وحدك بناء على نظام السوق المالية بالمرسوم الملكي م/30 وتاريخ 2/6/1424هـ ولوائحه التنفيذية الصادرة من مجلس هيئة السوق المالية: تعلن الهيئة للعموم بانه لا يجوز جمع الاموال بهدف استثمارها في اي من اعمال الاوراق المالية بما في ذلك ادارة محافظ الاستثمار او الترويج لاوراق مالية كالاسهم او الاستتشارات المالية او اصدار التوصيات المتعلقة بسوق المال أو بالاوراق المالية إلا بعد الحصول على ترخيص من هيئة السوق المالية.